Wasaaradda Maaliyadda Puntland oo Baarlamaanka Puntland horgeysay soo gudbinta Xisaab-xirka Miisaaniyadda 2021(Sawirro)

GAROOWE – Wasaaradda Maaliyadda Dowladda Puntland ayaa Golaha Baarlamaanka hor geysay soo gudbinta Xisaab-xirka Miisaaniyadda Dowladda ee 2021.

Kulanka waxaa shir Guddoominayay Guddoomiyaha Golaha Wakiillada Mudane Cabdirashiid Yuusuf Jibriil oo uu wehliyo Guddoomiye ku-xigeenka 1-aad Mudane Cabdicasiis Cabdullahi Cusmaan.

Hor-geynta Xisaab-xirka Miisaaniyadda ee golaha waxaa ka qayb-galay Ku-simaha Wasiirka ahna Wasiir Ku-xigeenka Maaliyadda Mudane Cumar Xasan (Fiqi)Wasiir Ku-xigeenka dakhliga Mudane Cali Cumar Caarshe, Xisaabiyaha guud ee Dowladda Cumar Saalax Xamari Agaasimaha Miisaaniyadda Cabdi Samad Surato iyo mas’uuliyiin kale oo ka tirsan Wasaaradda Maaliyadda.

Wasiir ku-xigeenka Wasaaradda Maaliyadda Ahna Ku-simaha Wasiirka Mudane Cumar Xasan Cumar Fiqi ayaa Golaha u soo jeediyey khudbad ku aadan soo gudbinta Xisaab-xirka Miisaaniyadda sannadka 2021,

Wasiirka ayaa ka hadlay wax qabadkii sanadii 2021 waxaana ka mid ahaa

1.  Dhamaystirka habraaca Maaliyadda.
2. Tirakoobka Shaqaalaha Dowladda.
3. Hirgelinta xarunta xogta Dowladda.
4. Hirgelinta dhismaha xarunta dakhliga.
5. Hirgelinta sanduuqa kaabayaasha dhaqaalaha dalka iyo qodobo kale.

Qorshaha sanadka 2022 sidoo kale ee Wasiirku soo jeediyey waxaa ka mid ahaa

1. Horumarinta nidaamka cashuuraha.
2. Hirgelinta nidaamka wax iibsiga.
3. Furitaanka Kastamka Dekadda Garacad.
4. Hirgelinta cashuuraha Berriga gobolka CAYN iyo qodobo kale.

Cumar Xasan Fiqi, Ku-simaha Wasiirka ahna Wasiir Ku-xigeenka Maaliyadda Dowladda Puntland ayaa ka hadalay qodobo muhiim u ah Miisaaniyadda 2021 ugu dambayna Golaha ka codsaday in ay ansixiyaan.

Baahintii

Xafiiska Wacyi-gelinta Iyo Warfaafinta Wasaaradda Maaliyadda Dowladda Puntland